ރޯދައިގެ މާތް އައި މައްސަރަށް ކިޔަމާ ހިތުން މަރްޙަބާ
ރޯދައިގެ ހެއުވީ ދަރުމައަށް އެދިގެން ކިޔާ މަރްޙަބާ
އެ މަހެއްތެރޭ ހާހުންގުނަވި ނިޢުމަތުގެރޭ ލައްވަވައި
އެ މަހުގެ ޤަދަރާ ޢިއްޒަތާ ލެއްވެވިއަތީ މަރްޙަބާ
ޢިލްމީ މި ދީން ފުރިހަމަވެގެން އައިހިނދު ވަޙީ ލިޔެވިގެން
ޢިލްމަށް އެތައް ފަންނެއް ގެނުވި އެ ފޮތުގެ މަހަށް މަރްޙަބާ
ބެހުމާ ދިނުން އިސްކޮށްލެވޭ އެކުވެރިކަމަށް ބަސް ކިޔައި
ވެހުމެއްކަމަށް ނިޢުމަތް “އޮހޭ” ފާގަތިމަހަށް މަރްޙަބާ
އަޚްވަންތަކަން ދިރުވައިދެމުން އާރޫޙުގައި ގޭތެރޭ
އުޚުތުން ތެރޭ ހިނިތުން ގުޅުން ގެނުވާމަހަށް މަރްޙަބާ
ގިނަގުނަ ދުއާކޮށް ކިޔެވުމަށް ފުރުސަތު ލިބޭ ރަކުޢަތުން
ގިނަކޮށް ޖަމާޢަތް ވީ ތަރާވީޙުގެ މަހަށް މަރްޙަބާ
މިވަރުގެ މަހެއް މިގޮތުގެ މަތީން މުސްލިމްތަކުންނަށް ލެއްވެވުން
އެވަރުގެ ޢަމަލު ކޮށް ދައްކަމުން ކިޔަމާ މަމެން މަރްޙަބާ
**********************